Wanfala niu politikol party long Solomon Islands olketa kolem Umi For Change or U4C, hemi lonsim manifesto blong hem long Auki long Malaita Provins long yestede, and bae hem kontestim tu National General Elections long April.
U4C Party ia hem kam aot from olketa key policy blong foma Mara Provinsol Gavman blong Malaita, and President blong hem nao hem foma Premier, Daniel Suidani.
Secretary blong Party, Celsus Talifilu hem se U4C Party hem laek fo kamap olsem wanfala nasinol forum wea hem garem olketa gudfala and honest lida wea hem wanfala challenge long kantri distaem.
Hem se, samfala long olketa samting U4C Party hem laek lukim nao hem wanfala politikol recall law fo stopem kaen wei we olketa memba save jajamp olobaot long olketa party, and fo gavman hem mas implementim Townsville Peace Agreement and rekomendesen blong Truth and Reconciliation Commission wea olketa past gavman bin ignorem nomoa.
Long audio bae iu herem Celsus Talifilu toktok abaotem disfala niu Umi For Change or U4C Party.